"60 миллиард сом сыртка алып чыккан". УКМК Финполдун Бишкек шаары боюнча башчысын кармады

Коррупция фактысы боюнча Экономикалык кылмыштарга каршы күрөшүү боюнча мамлекеттик кызматынын башкармалыгынын Бишкек шаары боюнча башчысы кармалды. Бул тууралуу УКМКнын маалымат кызматынан билдиришти.

Маалыматка ылайык, Финполдун Бишкек шаары боюнча башкармалыгынын башчысы К.Н. кечээ, 1-мартта кармалган.

"Аталган башкармалыктын кызматкерлери кызматтык абалынан пайдаланышып, жарандар менен сүйлөшүп алып, кылмыштуу кирешелерди легалдаштыруу (адалдоо) жана ири өлчөмдөгү каражаттарды Кыргыз өлкөсүнөн чыгарып кетүү боюнча туруктуу коррупциялык схеманы уюштурушкан.

Ушул мыйзамсыз иш-аракеттердин натыйжасында, 2020-жылдын март айынан октябрь айына чейин Кыргыз өлкөсүнөн 59 миллиард 500 миллион сом сыртка, ошол эле учурда салык төлөөдөн качуу түрүндөгү алдын ала зыян 500 миллион сомдон ашык болгон. Алынган маалыматка ылайык, Экономикалык кылмыштарга каршы күрөшүү мамлекеттик кызматынын кызматкерлери аталган мыйзам бузууларды жашырганы үчүн аталган каналдын уюштуруучуларынан 180 миллион сом өлчөмүндө пара алышкан. Кармалган адам убактылуу кармоочу жайына киргизилди", - деп жазылат маалыматта.

Учурда бул кылмышка тиешеси бар адамдардын бардыгын аныктоо үчүн тиешелүү тергөө иш-чаралар жүргүзүлүп жатканын кошумчалашты.