Экинчи митинг. "Сейтек" кичи базарынын соодагерлери митингге чыгышты

Бүгүн, 5-мартта "Ош базарынын" кире беришиндеги "Сейтек" кичи базарынын соодагерлери Бишкек шаардык мэриясынын алдында митингге чыгышты.

Алардын бирден бир талабы соода орундуктарына болгон ижара акыны төмөндөтүү болуп саналат. Нааразы болуп чогулгандардын айтымында, тийиштүү жерлерге кайрылып отуруп, барбаган жерлери, каккылабаган эшиктери калган эмес.

"Биздин чыкканыбыздын себеби, эч себепсиз эле орун үчүн ижара акыны жогорулатып жатышат. Мурда метр квадратына 50 сомдон төлөсөк, азыр 80 сомдон төлөп калдык. Аны эсептеп келе турган болсок, биздин эмгегибизди актабай калып жатат. Ал эми "Сейтек" базарынын кожоюндары сатуучулардын үнүн укпай жатышат. Тийиштүү жерлерге кайрылуубузду жолдодук, бирок эч кандай жарытылуу жооп ала албай жатабыз.

Буга чейин базардын ээлери менен бааны көтөрүү тууралуу эч кандай келишим болгон эмес. Өзүм билемдик менен бааны жогорулатып жатышат. Өрттөнүп кеткен бойдон базар эч кандай оңдөп-түзөөдөн өткөн эмес. Соодагерлер үчүн эч кандай шарттар жок. Базардын көйгөйүн айтып чыккандарга ээлери тараптан коркутуу болуп, кысымга алып жатышат", - деп билдиришти нааразы болгон соодагерлер.

Арадан көп өтпөй Бишкек шаардык мэриянын алдына Ленин районунун акими Чынасыл Чыныбаев чыгып жооп берди.

"Бул суроо боюнча биз тийиштүү чараларды көрүп, чечип берүүгө аракет кылабыз. Бул менчик базар болгондуктан, биз алардын кардары менен болгон келишимге кийлигише албайбыз. Алдыда комиссия менен бирге иш алып барып, ишти оңунан чечип берүүгө аракет кылабыз", - деп билдирди аким.

Эске салсак, 2018-жылы "Ош базарында" өрт чыгып, анын ичиндеги "Сейтек” жана “Берекет плюс” кичи базарында соода орундарын жалмап, жалпы аянты 3 миң 500 чарчы метрге жеткен жерди толугу менен күлгө айланткан. ӨКМ кырсыктын кесепетинен "Сейтек" кичи базарындагы 108 күркө, "Берекет плюс" базарындагы 10 соода түйүнү күйүп кеткенин маалымдаган болчу.