Бишкекте дайынсыз болуп изделип жаткан 59 жаштагы жарандын жансыз денеси табылды

Буга чейин Бишкек шаарында дайынсыз болуп изделип жаткан 59 жаштагы Талант Мырзаев аттуу жарандын жансыз денеси табылды. Бул тууралуу Чүй ОИИББинин маалымат кызматынан билдиришти.

Маалыматка караганда, 4-март күнү Сокулук РИИБине Күн-Туу айылынын көчөлөрүнүн биринен адамдын жансыз денеси табылганы боюнча билдирүү келип түшкөн.

"Айтылган дарекке милиция кызматкерлери барып, жансыз денеге кароо жүргүзгөндө эч кандай зомбулуктун белгилери байкалган эмес. Жүргүзүлгөн иликтөө иш-чараларынын жүрүшүндө, буга чейин Аламүдүн РИИБи тарабынан издөөдө жүргөн 1962-жылы туулган Т.М. экендиги аныкталган. Ал 21-февралда үйдөн чыгып кеткен бойдон кайтып келген эмес. Иштин бардык жагдайларын тактоо үчүн бардык зарыл болгон экспертизалар дайындалды", - деп билдиришти Чүй ОИИББинен.

Эске салсак, аталган жаран бир ай мурун инфаркт болуп, акыл-эсин жарым-жартылай жоготконун айтып уул-кыздары издөө салган.