Максат Мамытканов өкмөттүн курамына кирбей калышы боюнча пикирин айтты

Мурдагы вице-премьер-министр Максат Мамытканов өкмөттүн курамына кирбей калышы боюнча пикирин айтты. Бул тууралуу ал SUPER.KG порталынын #ГалстукТар долбоорунун алкагында билдирди.

"Октябрь окуясынан кийин түзүлгөн өкмөткө келгенде реформаларды жасайбыз деп келгенбиз. Ошондо элдин алдында реформаны аткаруу бийлигинен баштайбыз деп убада бергенбиз. Эл өтө көп акча сарпталган мекемелерди жоюуну талап кылган. Биринчи күндөн баштап өкмөттүн курамы боюнча комиссия түзүлгөн. Комиссиянын жыйынтыгында, жаңы өкмөттүн түзүмү сунушталган болчу. Жаңы түзүм президенттин чечими менен кабыл алынды. Буга чейин 4 вице-премьер-министр бар болчу. Кыскартылды. Элдин алдында берген убаданы аткарган үчүн биз муну туура кабыл алдык.

Мамлекет жетекчилери башка кызматты сунуштаса көрөбүз. Улукбек Марипов мага телефон чалып, сүйлөшкөнбүз. Ага чейин Садыр Жапаров менен сүйлөшкөм. Алар силердин тажрыйбаңарды колдонобуз, сунуш болсо четке какпагыла деп айткан. Биз эл үчүн иштегенге макулбуз", - дейт ал.