Илон Маск бир күндө рекорддук 25 миллиард долларга ээ болду

Bloomberg агенттигинин жана Bloomberg Billionaires Index (BBI) маалыматтары боюнча SpaceX жана Tesla акцияларына ээлик кылган Илон Масктын байлыгы бир күндө 25 миллиард долларга секирип кетти. Бул тууралуу чет элдик басылмалар жазды.

Маалыматка ылайык, Bloomberg Billionaires Index'тин айтымында, Масктын байлыгы азыр 174 миллиард долларды түзөт. Ал байлыгы 180 миллиард долларды түзгөн Amazon компаниясынын негиздөөчүсү Жефф Безостон кийин экинчи орунда турат. Акыркы суткада Безостун байлыгы 5 миллиард долларга көбөйдү.

Масктын байлыгы электромобилдерди чыгаруучу Tesla компаниясынын акцияларынын өсүшүнөн улам көбөйгөн. Буга чейин январь айынын башында Маск дүйнөдөгү эң бай адамдардын тизмесинде Безосту жеңип, биринчи орунга чыккан, бирок февраль айында экинчи орунга кайтып келген.