Өзгөндө жергиликтүү тургундун торпокторун уурдап, базарга сатып жиберген деген шек менен 3 адам кармалды

Ош облусунун Өзгөн районунда жергиликтүү тургундун торпокторун уурдап, базарга сатып жиберген деген шек менен 3 жаран кармалды. Бул тууралуу Ош ОИИБинин басма сөз кызматынан билдиришти.

Маалыматка ылайык, 8-март күнү Өзгөн РИИБинин нөөмөт бөлүмүнө 64 жаштагы М.Ч. арыз менен кайрылган. Арызда 7-март күнү түнкү саат 02:00 чамасында мал сарайынын ичинде камалып турган 2 торпогун белгисиз адамдар уурдап кетишкендигин билдирген. Бул факты боюнча кылмыш иши козголуп, териштирүү башталган.

10-март күнү Өзгөн РИИБинин криминалдык милиция кызматынын ыкчам өкүлдөрүнүн жүргүзгөн иш-чараларынын негизинде окуяга шектүү катары 54 жаштагы Б.Ч., 23 жаштагы А.у.А жана 24 жаштагы К.У. аттуу адамдар кармалган.

Сотко чейинки өндүрүштүн жүрүшүндө шектүүлөр торпокторду Хундай-Портер унаасына жүктөп, Кара-Суу районунда жайгашкан "Учкун" мал базарына алып барып 74 миң сомго сатып жибергендиги аныкталган. Кармалган адамдар убактылуу кармоочу жайга киргизилген.

Азыркы күндө кармалган жарандар Өзгөн районунун аймагында болгон башка кылмыштарга тиешеси бар же жок экендиги боюнча тергөө иштери жүргүзүлүп жатат.