Бишкекте унаанын дөңгөлөктөрүн уурдап кеткенге шектелген жаран кармалды

Бишкекте унаанын дөңгөлөктөрүн уурдап кеткенге шектелген жаран кармалды. Бул тууралуу кайгуул кызматынан билдиришти.

Маалыматка ылайык, 11-март күнү болжол менен саат 13:40 чамасында Бишкек ШИИББинин “102” кызматына Көк-Жар конушунан унаанын дөңгөлөктөрүн уурдап жатышат деген маалымат келип түшкөн. Айтылган дарекке барган кайгуул кызматы аталган жерге барганда 1989-жылы туулган Ш.Т. аттуу жаран арыз менен кайрылган.

Анда болжол менен саат 13:30 чамасында жашы 30-35 курактагы белгисиз жаран унаанын дөңгөлөгүн жашыруун уурдап кеткенин айткан. Чакыруу менен келген милициянын кайгуул кызматкерлери ошол замат чечим кабыл алып кылмыштын изи сууй электе шектүү катары 1988-жылы туулган В.Е. аттуу жаранды кармашып Свердлов РИИБинин тергөө кызматына өткөрүп беришкен.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.