Карантиндик чектөө кайра кириши мүмкүн экени айтылды

Коронавирус инфекциясы менен ооругандардын саны көбөйсө, карантиндик чектөөлөр кайрадан кириши мүмкүн. Бул тууралуу саламаттыкты сактоо жана социалдык өнүктүрүү министринин орун басары Нурболот Үсөнбаев "Марал" радиосуна берген маегинде билдирген.

"Беткап кийбесек, илдеттин жаңы штаммы келе турган болсо, өткөн июлда болгон окуялар бери жакта калат. Биз бир нерсени бат унутуп калуу адатыбыз бар.

Карантиндик шарттар сакталбагандыгы үчүн толкундар кайра пайда болууда. Элдин арасында оору өсө баштаганда карантиндик чектөөлөрдү кайра киргизүү керек. Биз да беткап такпай, айтылгандарды укпасак, чектөөлөрдү киргизүүгө мажбур болобуз", - деген Үсөнбаев.

Белгилей кетсек, өлкөдө акыркы бир сутка ичинде COVID-19 жана пневмония оорусу 79 адамдан аныкталып, 49 бейтап илдетти жеңип чыкса, бир адам каза болду.