"Туура эмес маалыматтар тарап жатат, жыйынтык чыгаруу эрте". Мыкаачылык менен өлтүрүлгөн 5-класстын окуучусунун ата-энеси дагы сурак берүүдө

Бүгүн, 17-мартта Бишкек шаарындагы Мурас-Ордо жаңы конушунда 5-класстын окуучусун мыкаачылык менен өлтүрүп кетишкен.

SUPER.KG порталы жерине барганда укук коргоо органдары каза болгон баланын 10-класста окуган агасы күбө катары сурак берип жатканын билдиришкен.

Ал эми каза болгон баланын үйүнө барганда Шумкарбек аттуу тууганы алар эч кандай чырга аралашпаган үлгүлүү үй-бүлө экенин айтып, окуянын чын-бышыгын өздөрү дагы билбей турганын айткан.

Бул факты Биринчи Май РИИБинин Кылмыштардын жана жоруктардын бирдиктүү реестрине катталып, сотко чейинки өндүрүшкө алынды. Учурда аталган райондук ички иштер бөлүмүндө баланын агасы жана ата-энеси сурак берүүдө. Алар жакынкы 3-4 саат аралыгында чыгышпайт. Бул тууралуу биздин порталга укук коргоо органдарынан билдиришти.

"Социалдык тармактарда 13 жаштагы баланы мууздап кеткени боюнча ар кандай туура эмес маалыматтар тарап жатат. Үйүнө ууру кирген же агасы күнөөлүү деген сыяктуу маалыматтар жүрөт, учурда тергөө жүрүп жаткандыгына байланыштуу кандайдыр бир жыйынтык чыгаруу эрте. Азырынча комментарий бере албайбыз", - деп билдиришти укук коргоочулар.