Дүйнөлүк спорт: Америкалык боксчу Тимоти Брэдли чемпиондук наамын сактап калды

12-октябрь күнү АКШнын Лас-Вегас шаарында Дүйнөнүн мурдагы чемпиону Мэнни Пакьяону жеңген боксчулардын беттеши өттү. Анда америкалык Тимоти Брэдли менен мексикалык Хуан Мануэль Маркес беттешип, беттештин жыйынтыгында калыстардын талаш туудурган чечими менен америкалык боксчу жеңүүчү аталды. Беттештин жыйынтыгында 3 калыстын бири 115:113 упай менен Маркести жеңүүчү деп тапса, калган эки калыс 115:113, 116:112 упай менен Брэдлини жеңүүчү деп табышты. Беттештен кийин Маркес: “Лас-Вегаста атаандашыңа караганда да калыстардан коркунуч көбүрөөк жаралат. Күйөрмандар жакшы беттешке күбө болушту, калыстар кайрадан туура эмес чечим чыгарды. АКШда нокаут менен гана жеңишке жете аласың”, -деди. Айта кетсек, Брэдли дүйнөнүн мурдагы чемпиону Мэнни Пакьяо менен болгон беттеште да калыстардын жардамы менен жеңип кеткен. Ал эми Тимоти Брэдли: “Мен беттеш тең болду дегенге кошулбайм. Анткени беттешти толугу менен көзөмөлдөп турдум жана беттеш аяктаганда калыс жеңүүчү деп менин колумду көтөрөт деп ишенгем”,- дейт. Ошол эле күнү бокс дүйнөсүнүн көңүлүн өзүнө бурдурган дагы бир беттеш орун алды. Анда Олимпиаданын эки жолку жеңүүчүсү, украиналык Василий Ломаченко профессионалдар арасындагы биринчи беттешин мексикалык Хосэ Луис Рамиреске каршы өткөрдү. Беттештин 4-раундунда Ломаченконун катуу соккусунан атаандашы беттешти уланта алган жок. Беттештен кийин Ломаченко: “10 раундду толугу менен өткөрүп өзүмдү сынап көрөйүн дегем. Бирок колум өзү иштеп кетип беттеш мөөнөтүнөн мурда аяктады”,- дейт. Ошентип бокс адистеринин пикири боюнча келечекте эң күчтүү боксчулардын бири болууга бардык мүмкүнчүлүгү бар Василий Ломаченко профессионалдар арасына ийгиликтүү кадам таштады. Биринчи беттешинен кийин эле Ломаченко WBO (Дүйнөлүк бокс уюму) интернационалдуу чемпион аталды.