"Көп жер тилке, батир, кеңсе, коттедж жана башка байлыктар". УКМК Жогорку Кеңештин депутаты мыйзамсыз байыганын маалымдады

Жогорку Кеңештин депутаты А.М.А. мыйзамсыз байыгандыгы аныкталды. Бул тууралуу УКМКнын маалымат кызматынан билдиришти.

Билдирүүгө ылайык, мамлекеттик бийлик органдарындагы коррупциялык кылмыштарды жоюу боюнча жүргүзүлүп жаткан иш-чаралардын жүрүшүндө, бийликтин мыйзам чыгаруу бутагынын өкүлү - Жогорку Кеңешинин депутаты А.М.А тарабынан мыйзамсыз баюу фактылары аныкталды.

"Такталгандай, А.М.А. саясий ишмердүүлүгүнүн жүрүшүндө кымбат баалуу кыймылдуу жана кыймылсыз мүлккө ээ болуп, анын жалпы суммасы расмий кирешесинен бир нече эсе жогору болгон. Мындан тышкары көмүскө активдерин жашыруу үчүн аларды жакын туугандарына жана кирешеси расмий тастыкталбаган аффилирленген адамдарга каттаткан.

Атап айтсак, соода жана көңүл ачуу комплекси, Бишкек шаарынын жана Ысык-Көл облусунун аймагында жайгашкан 14 жер тилкеси, 3 кеңсе жана 4 турак жай, 5 батир, "Каприз" борборундагы коттедж, 3 хан сарай, ошондой эле жогорку өкүлдүк класстагы 5 аткаруучу унаа. Бул активдердин жалпы орточо базар баасы 1 миллиард 500 миллион сомдон ашык.

Жогорудагы активдерге келип чыгуунун мыйзамдуулугун берүү максатында A.M.A. аларды сатып алуудан мурун, тиешелүү насыяларды финансы-кредит мекемелерине берген. Аталган А.М.А. 2008-2020-жылдар аралыгында Бишкек шаардык кеңешиндеги жана Жогорку Кеңешиндеги саясий таасирин колдонуу менен активдерин кыйла көбөйткөндүгү божомолдонууда", - деп жазылат маалыматта.