"Бүтүн Кыргызстан" партиясы Сүлүктү шаардык кеңешинин шайлоосунан четтетилди

"Бүтүн Кыргызстан" саясий партиясы Сүлүктү шаардык кеңешинин шайлоосунан четтетилди. Бул тууралуу аталган партиянын мүчөсү Мирбек Мунарбек уулу SUPER.KG порталына билдирди.

"Партия Сүлүктү шаардык кеңешине катышуу үчүн талапкерлердин тизмесин 1-мартта Сүлүктү аймактык шайлоо комиссиясына тапшырган. Мыйзамга ылайык, 24 сааттын ичинде аймактык шайлоо комиссиясы партияны каттоого тоскоолдук кылган документтер боюнча билдирүүгө тийиш. Жогорудагы мыйзам талабын көзгө илбей 8 күндөн кийин, тагыраагы 9-март күнү гана туура эмес толтурулган документтер боюнча билдирүү берип, 11-март күнү мыйзамды одоно түрдө бузуп, партияны каттоодон баш тартты. 13-март күнү "Бүтүн Кыргызстан" партиясы Сүлүктү аймактык шайлоо комиссиясынын чечимин жокко чыгаруу боюнча Борбордук шайлоо комиссиясына кайрылды. 16-март күнү БШК да аймактык шайлоо комиссиясынын чечимин туура деп эсептеп, күчүндө калтырды. 18-март күнү партия БШКнын чечимине макул эмес экенин билдирип, Бишкек шаардык административдик сотуна кайрылган. 20-март күнү Бишкек шаардык административдик соту "Бүтүн Кыргызстан" партиясын Сүлүктү шаардык кеңешине катыштырбоо чечимин кабыл алды. Биз ага макул эмеспиз, мыйзамда көрсөтүлгөн убакыттын ичинде Жогорку Сотко кайрылабыз", - дейт Мунарбек уулу.