"Байгемдин 80 пайызын жетим, жесирге берем". Идрис Айтибаев баш байге алды

"Айтыш" коомдук фондунун 20 жылдыгына карата, Тоголок Молдонун 160 жылдыгына арналган республикалык Айтыш-2021 сынагы болуп өттү. Анда төкмө акын Идрис Айтибаев баш байгеге ээ болуп, 1-орунду Баян Акматов, 2-орунду Акматбек Султан уулу жана 3-орунга Тынчтыкбек Эсенбай уулу татыды.

Баш байге 200 миң сом, 1-орун 150 миң сом, 2-орун 100 миң,
3-орун 50 миң сом. Ошондой эле калган акындар диплом жана 30 миң сом кызыктыруучу сыйлыктарга ээ болушту.

Байге фонду 1 миллион сомду түзгөн айтышка 12 акын катышты. Тандоо туру 27-мартта КТРКнын концерттик залында өтүп, 42 акын ат салышкан.

“Үйдөн чыгып жатканда эгер байге алсам кайрымдуулукка жумшайм деп ниет кылып чыктым эле. Эми байгемдин 80 пайызын жетим, жесирге берем. Калган 20 пайызын ата-энеме, үй-бүлөмө жумшайм”, - деди баш байгеге татыган Айтибаев.