Түркиянын көпчүлүк провинцияларына дем алыш күндөрү коменданттык саат киргизилди

Түркиянын көпчүлүк провинцияларында дем алыш күндөрү коменданттык саат киргизилди. Бул тууралуу аталган өлкөнүн президенти Режеп Тайип Эрдоган өкмөттүн жыйынында билдиргенин жергиликтүү маалымат каражаттары жазып чыгышты.

"Коронавирус илдетинен каза болгондордун саны көбөйүп жатканы коопсуздук чараларын кайрадан карап чыгууга аргасыз кылды. Өлкөбүздүн 80 пайыз калкы жашаган 58 провинция кооптуу аймак бойдон калууда. Ал аймактарда дем алыш күндөрү коменданттык саат киргизилет. Анда кечки 21:00дөн 05:00гө чейин коменденттык саат өкүм сүрөт", - деген Режеп Тайип Эрдоган.

Түркияда ишемби күнү 30 миң 21 адамдан COVID-19 диагнозу аныкталган. Бул көрсөткүч декабрь айынын башынан тарта эң жогорку көрсөткүч болгон.

Белгилей кетсек, аталган өлкөдө январь айында коронавируска каршы эмдөө жүргүзүлө баштаган. Алгач медицина кызматкерлери, мугалимдер жана улгайган курактагы адамдар эмдөө алышкан. Учурда алты миллион жаран эмдөөдөн өткөн.