УКМК тарабынан кармалган салык кызматынын Биринчи Май районунун башчысы кызматтан бошотулду

Биринчи Май райондук салык органынын башчысы ишеничтен кеткендигине байланыштуу кызматтан бошотулду. Бул тууралуу Мамлекеттик салык кызматынан билдиришти.

Маалыматка ылайык, аны кызматтан бошотууга пара талап кылуу фактысы боюнча УКМК тарабынан кармалышы негиз болду.

"Салык кызматынын жетекчилиги тарабынан мекеме ичиндеги коррупция жана паракорчулукка каршы күрөшүү боюнча кабыл алынган чараларга карабастан салык органынын кызматкерлери пара алгандыгы үчүн кармалган фактылар орун алууда. Салык кызматынын жетекчилиги таза эмес кызматкерлердин аныкталышына кызыкдар жана коррупциялашкан кызматкерлерден арылуу боюнча зарыл болгон бардык чараларды көрүүдө", - деп жазылат маалыматта.

Белгилей кетсек, бүгүн, 31-мартта УКМК аталган башчы жеке ишкерлерден пара алып жүргөн туруктуу коррупциялык схемасы аныкталганын маалымдаган. Ал кечээ, 30-мартта кармалып, убактылуу кармоочу жайга киргизилген.