Бишкекте түн ичинде аял кишинин телефонун жана акчасын уурдап кеткенге шектелген жарандар кармалды

Бишкекте түн ичинде аял кишинин телефонун жана акчасын уурдап кеткенге шектелген жарандар кармалды. Бул тууралуу милициянын кайгуул кызматынан билдиришти.

Бүгүн, 1-апрелге караган түнү болжол менен саат 02:10 чамасында Бишкек ШИИББинин 102 кызматына Салиева жана жана Алма-Ата көчөлөрүнүн кесилишинен уюлдук телефон уурдап кетишти деген маалымат келип түшкөн. Айтылган дарекке ошол замат милициянын кайгуул кызматкерлери келип, маалыматты тактаганда, 1984-жылы туулган А.А. аттуу аял киши арыз менен кайрылган.

Ал ошол даректе жайгашкан кафелердин биринен белгисиз жарандар арыз ээсинин уюлдук телефонун жана 3 миң сом акчасын жашыруун уурдап кетишкенин айткан. Шектүүнү ыкчам кармоо иш-чараларында шектүү катары 1998-жылы жана 1992-жылы туулган жарандар кармалып, Свердлов РИИБинин тергөө кызматына өткөрүп беришкен.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.