Премьер-министр шайлоону жана референдумдун жогорку деңгээлде өткөрүлүшүн камсыздоо зарыл экенин айтты

Премьер-министр Улукбек Марипов жергиликтүү кеңештерге депутаттарды шайлоого жана референдумга даярдык көрүү жана аны өткөрүүдө уюштуруу-техникалык маселелерин чечүүдө шайлоо комиссияларына көмөк көрсөтүү боюнча Республикалык штабдын кезектеги кеңешмесин өткөрдү. Бул тууралуу өкмөттүн басма сөз кызматынан билдиришти.

"Тийиштүү мамлекеттик органдар, жергиликтүү бийлик органдары Борбордук шайлоо комиссиясы менен биргеликте 11-апрелдеги шайлоо процессинин жогорку деңгээлде уюштурулушун жана өткөрүлүшүн камсыздоосу керек. Шайлоо ачык-айкын өтүшү керек. Мурда кетирилген кемчиликтер кайталанбашы зарыл. Ушул күнү коомдук коопсуздук камсыздалып, шайлоо участокторунда электр жарыгы жана интернет өчүрүлбөшү керек. Эпидемиологиялык абалды эске алуу менен санитардык-эпидемиологиялык коопсуздукту камсыздоо, орнотулган эрежелерди жана ченемдерди сактоо боюнча ишти күчтөндүрүүнү өтүнөм. Тийиштүү мамлекеттик органдар мыйзам бузуу фактылары боюнча ыкчам жооп кайтарып, тийиштүү чараларды кабыл алуусу зарыл. Жарандардын добуш берүүсү үчүн бардык шарттар түзүлүүгө тийиш", - деди Улукбек Марипов. Ошондой эле мамлекеттик жана жергиликтүү бийлик органдарына бир катар тапшырмаларды берди.

Өкмөт башчы баса белгилегендей, мамлекеттик жана муниципалдык органдардын өкүлдөрү шайлоо процессине кийлигишпеши керек, административдик ресурсту пайдаланууга жол берилбеши тийиш.

Улукбек Марипов мекендештерди 11-апрелде жарандык активдүүлүктү көрсөтүп, аң-сезимдүү тандоо кылууга чакырды.