Окумуштуулар иттер өз ээсин кызганарын аныкташты

Жаңы Зеландиядагы Окленд университетинин окумуштуулары иттер өз ээсин кызганарын аныктап чыгышты. Бул тууралуу чет элдик басылмалар жазышууда.

Маалыматка ылайык, мындай тыянакка келиш үчүн окумуштуулар 18 иттин жана алардын ээлери менен биргеликте эксперимент жасап көрүшкөн. Анда катышуучуларды биринде геометриялык фигуралар бар, биринде иттин куурчагы бар 2 бөлмөгө киргизишкен. Шартка ылайык, иттердин ээлери бөлмөдөгү буюмдар менен ойношкон. Иттин ээси куурчак менен ойногон учурда үй жаныбарларынан кызгануунун ачык белгилери байкалган. Ал эми геометриялык фигуралар менен ойногондо эч кандай эмоциялар байкалган эмес.

Буга байланыштуу окумуштуулар "өзү сыяктуу социалдык атаандаш пайда болгон учурда иттерде ээсин кызгануу сезимдери пайда болот" деген тыянакка келишкен.