"Кичүүсү 8 айлык". Тажикстанда апасы үч баласын асып, андан кийин өз жанын кыйды

Тажикстандын Согди облусунда үч бала жана бир аял даракка асынган абалда табылды. Бул тууралуу аталган өлкөнүн басма сөз каражаттары жазып чыгышты.

Маалыматка ылайык, Пенжикент районунун Некнот айылынын тургундары даракка асылып турган төрт адамдын жансыз денесин табышкан. Жергиликтүү тургундун айтымында, каза болгондор 32 жаштагы Шахло Шарипова жана анын 6 жаштагы Мухаммаджон, 4 жаштагы Шахноза жана 8 айлык Амина деген балдары болгон.

Кийинчерээк Ички иштер министрлиги окуя тууралуу билдирүү тараткан. Анда "10-апрелде Пенжикент районунун Некнот айылынын тургуну 1988-жылы туулган Шарипова Шахло аттуу жаран үй-бүлөлүк чырдан улам үч баласын жоолук менен даракка асып, андан соң өзүн асып алган. Окуя алар жашаган айылдын жанында болгон", - деп билдиришкен министрликтен.

Өз жанын кыйган Шахло Шарипова Дүйшөмбү шаарында төрөлгөн. Ал бир нече жыл мурун Жураев аттуу жаранга турмушка чыккан. Некноттун жашоочулары буга чейин жубайлардын үйүндө олуттуу көйгөй болбогонун айтып беришкен. Алар мал багуу жана дыйканчылык менен алектенип келишкен.