Сокулукта 33 жаштагы жаран "2 өгөй кызына жыныстык аракеттерди жасады" деп айыпталууда

Сокулук районундагы Шопоков шаарынын 33 жаштагы тургуну "бойго жете элек 2 өгөй кызына жыныстык аракеттерди жасады" деп айыпталууда. Бул тууралуу бүгүн, 17-октябрда Чүй облустук ички иштер башкармалыгынын басма сөз кызматы билдирди. Маалыматка таянсак, 14-октябрь күнү милицияга Шопоков шаарынын тургуну арыз менен кайрылып, ал аял 10-13-октябрь күндөрү өзү үйүндө жок учурда жарандык никеде жашаган күйөөсү 2003 жана 2005-жылы туулган кыздарына жыныстык маанайдагы аракеттерди жасаганын айткан. Сокулук райондук ички иштер башкармалыгынын кызматкерлери аталган шектүү жаранды кармашты. Учурда ал убактылуу кармоочу жайга киргизилип, факты боюнча соттук-медициналык жана соттук-психикалык экспертиза дайындалды. Тергөө амалдары жүрүп жатат.