Ошто шайлоо жыйынтыгына нааразы партиялар Садыр Жапаровго кайрылуу жолдошту

Ош шаардык кеңешине шайлоого катышкан бир нече партия шайлоонун жыйынтыгына нааразы болуп, президент Садыр Жапаровго кайрылуу жолдоду.

Нааразы болуп, шайлоо ыксыз, ыплас өттү деп эсептеген партиялар “Улуу Журт”, “Улуттар биримдиги”, “Ишеним”, “Республика”, “Бир Бол”, “Тилектештик” жана “Бүтүн Кыргызстан” партиялары.

Бул тууралуу “Бүтүн Кыргызстан” партиясынын Ош шаарындагы өкүлү Сейит Довлатов SUPER.KG порталына комментарий берди. Анын айтымында, шайлоо көз көрүнө калыс эмес, одоно мыйзам бузуулар менен өткөн.

"Биз бүгүн шайлоо жыйынтыгын тааныбаган 7 партия президентке кайрылуу жолдодук, кайрылууга кол койгондордун арасында өзүм да бармын. Анткени шайлоо одоно, ыксыз мыйзам бузуулар менен өттү, административдик ресур кеңири колдонулду.

Кайрылууда биз президент шайлоо жыйынтыгын жокко чыгарып, кайра шайлоо өткөрүп берүүсүн камсыздап берүүсүн сурандык. Негизи шайлоо мындай болбош керек болчу, биз оңолбой койдук. Албетте, мындай добуш сатуу менен кийинки муундарды да бузуп жатабыз. Бизде добуш сатуу токтогондо, элдер жүрөгү менен сатылбай шайлаганда гана алдыга жылуу болот", - дейт Довлатов.

Ал кошумчалагандай, нааразы болгондор Ош шаардык мэриясы мыйзам бузууга кайдыгер карады деп мэр Таалайбек Сарыбашевдин жоопкерчилигин да карап чыгууну талап кылып жатышат.

11-апрелде өткөн жергиликтүү кеңештерге шайлоодо Ош шаардык кеңешине тогуз партия ат салышкан. Шайлоонун баштапкы жыйынтыгы менен төрт партия алдыга оозуп чыккан.

"Ата-Журт Кыргызстан" 48,8 пайыз, "Улуттар биримдиги" 18,0 пайыз, "Ыйман Нуру" 8,1 пайыз, "Ынтымак" 7,5 пайыз добуш алган. Мыйзамга ылайык, бул партиялар босого чектен өттү жана мандаттар аталган партиялардын арасында бөлүштүрүлөт.