Францияда AstraZeneca вакцинасы менен эмделгенден кийин сегиз адам каза болду

Францияда тромбоздон 8 адам каза болду. Тромбоз AstraZeneca вакцинасы менен эмдөөдөн өткөндөн кийин пайда болгон. Бул тууралуу аталган өлкөнүн Дары-дармектердин коопсуздугу боюнча улуттук агенттиктин билдирүүсүнө таянып, чет элдик басылмалар жазып чыгышты.

Маалыматка ылайык, Францияда 2 миллион 72 миң (8-апрелге карата) адам аталган вакцина менен эмделген. Эмдөө кампаниясы башталгандан бери өлкөдө тромбоздун 23 учуру катталып, алардын сегизи өлүмгө алып келген.

Апрель айында Европалык дары-дармек агенттигинин (EMA) өкүлү Марко Кавалери AstraZeneca вакцинасы менен тромбоздун ортосунда байланыш бар экенин тастыктады. Бирок ал регулятор вакцинаны колдонуу тромбозду кандайча алып келерин так аныктай электигин билдирген. Ошондой эле кандын уюп калуу коркунучун дарынын сейрек кездешүүчү терс таасирлеринин тизмесине киргизүүнү талап кылган, бирок вакцинанын пайдасы андай коркунучтардан кыйла жогору экендигин баса белгилеген.

Белгилей кетсек, Францияда AstraZeneca вакцинасы менен 55 жаштан жогору курактагыларга гана эмдөө жүргүзүүгө уруксат берилген.