Орусияда мектеп жашындагы балдары бар бардык үй-бүлөлөргө 10 миң рублдан төлөнөт

Орусиянын президенти Владимир Путин Федералдык жыйынга кайрылуу менен чыгып сүйлөп жатып, мектеп жашындагы балдары бар бардык үй-бүлөлөргө 10 миң рублдан төлөп берүүнү сунуш кылды. Бул тууралуу орусиялык басылмалар жазышты.

"Мен мектеп курагындагы балдар чоңойуп жаткан үй-бүлөлөргө дагы бир төлөм киргизүүнү сунуш кылам, тактап айтканда бардык мектеп окуучулары үчүн 10 миң рублдан берүү. Ошондой эле бул чараны жаңы гана мектепке бара турган балдарга жайылтууну сунуш кылам. Төлөм ата-энелер балдарын мектепке даярдоого үлгүрүшү үчүн августтун ортосунда берилиши керек", - деген Путин.

Ошондой эле ал толук эмес үй-бүлөлөрдө же ата-энеси ажырашып кеткен жана алардын бири алимент алууга укугу бар үй-бүлөлөрдө өсүп жаткан балдарды да колдоо керектигин айткан. 8 жаштан 16 жашка чейинки толук эмес үй-бүлөлөрдүн балдарына айына 5 миң 650 рубль төлөнөөрү күтүлүүдө.

Андан сырткары Владимир Путин оор кырдаалда турган кош бойлуу аялдарга айына 6 миң 350 рубль төлөп берүүнү сунуш кылган.