Казакстан аркылуу өткөн Бишкек-Талас каттамы жанданды. Маршрут 1 жыл мурда токтотулган

Пандемияга байланыштуу Казакстан тарабынан токтотулган Бишкек-Талас каттамы жанданды. Коңшу өлкө өткөн жылдын март айында токтотулган каттамды калыбына келтирүү чечимин кабыл алды.

Тышкы иштер министрлигинин маалыматына ылайык, Бишкек-Талас багытындагы транспорт каражаттарынын Жамбыл облусу аркылуу каттамы калыбына келтирилди. Бул чечим президент Садыр Жапаров менен Казакстандын президенти Касым-Жомарт Токаевдин ортосундагы сүйлөшүүлөрүнүн жана өкмөттөр аралык кеңештин 9-жыйынынын жүрүшүндө жетишилген макулдашуунун натыйжасы болуп саналат.

Буга чейин 2020-жылдын 16-мартынан баштап Бишкек-Талас-Бишкек маршруту казак тарабынан коронавирус пандемиясына байланыштуу токтотулган. Бишкек жана Талас шаарларынын ортосундагы транспорттук байланыштар иш жүзүндө токтоп, жүргүнчүлөрдү ташуу, анын ичинде ден соолугунун мүмкүнчүлүгү чектелген жарандарды, карыларды жана балдарды ташуу процесси татаалдашканын белгилешти министрликтен.