Кочкордогу жаш келинди атка сүйрөтүп, мыкаачылык менен өлтүрдү делген жаран өмүр бою эркинен ажыратылды

Ушул жылдын 23-январында Нарын облусуна караштуу Кочкор районунун Теңдик айылынын Тынай-Булак кыштоосундагы сарайда 22 жаштагы келиндин жансыз денеси табылып, анын күч колдонуп өлтүрүлгөнү аныкталган.

Арадан көп убакыт өтпөй, келинди өлтүрдү делген шектүү Ош облусунун Ноокат районунан кармалган. Ал Баткен облусунун 1995-жылы туулган тургуну болгон.

Бул окуя боюнча Кочкор райондук соту чечим чыгарды. Анда айыпталуучу өмүр бою эркинен ажыратылды. Бул тууралуу SUPER.KG порталына Нарын облустук сотунун басма сөз кызматынан билдиришти.

Маалыматка ылайык, чечим 20-апрель күнү чыккан.

Буга чейин SUPER.KG порталы өздүк булактарга таянып, келиндин күйөөсү мас абалда келип ур-тепкиге алып, аёосуз сабаганын, күйөөсүнөн качып чыккан келиндин артынан ат менен барып, ал жактан чынжыр менен атка байлап, өздөрү жашаган сарайга чейин сүйрөтүп келгенин айтып беришкен.