Борбордук шайлоо комиссиясынын алдында кайрадан нааразычылык акциясы өттү

Бүгүн, 22-апрелде бир нече партиялардын өкүлдөрү Борбордук шайлоо комиссиясынын алдына митингге чыгышты. Алар Бишкек шаардык кеңешке болгон шайлоонун жыйынтыгын жокко чыгарууну талап кылышты.

Чогулгандардын айтымында, шайлоодо добуш сатып алуу орун алганына байланыштуу кайрадан шайлоо өткөрүү керек.

"Бул ыплас шайлоонун жыйынтыгы жокко чыгарылышы керек, биздин үнүбүз жетет деп ойлойбуз. Шайлоо калыс өткөн жок, сатып алуулар болду. Өзүңөр билгендей, олигархтардын партиялары өтүп кетти. Жаңы партиялар, жаңы жүздөр калып калдык. Көп нерселерге БШК көз жумуп жатат, бир партияны тизмеден алып коюп эле бүттү эмес. Бул жыйынтыкка нааразы болгондор көп, биз Орозо күнүндө чыкпай тургула деп токтотуп жатабыз", - деп билдирди акциянын катышуучуларынын бири.

Митингчилерге БШКнын төрайымынын орун басары чыгып, нааразы болгондордун арызы каралып жатканын убагы келгенде жыйынтык чыгарыларын маалымдады.