Прокуратура: "Таласта менчикке берилип кеткен 16 гектар жер тилкеси мамлекетке кайтарылды"

Талас облусунда мамлекетке 16 гектар жер кайтарылды. Бул тууралуу Башкы прокуратуранын маалымат кызматынан билдиришти.

Маалыматка ылайык, Кара-Буура райондук прокуратурасы тарабынан менчикке берилип кеткен жер тилкеси мамлекетке кайтарылды.

"Жайыт жерлер мамлекеттин гана менчиги экендигине карабастан, 2005-жылы Чолпонбай айыл өкмөтүнүн жооптуу кызматкерлери жайыттан 16 гектар жер тилкесин жаранга мыйзамсыз менчикке берип салышкан.

Бул факты Кылмыштардын жана жоруктардын бирдиктүү реестрине 320-беренеси "кызмат абалынан кыянаттык менен пайдалануу" менен катталып, сотко чейинки өндүрүш иши тергелүүдө. Мыйзамсыз берилген жайыт жерди мамлекетке алуу максатында, райондук прокуратура тарабынан сотко тиешелүү доо арыздар киргизилип, алар толугу менен канааттандырылган жана жер тилкеси мамлекеттин менчигине кайтарылды", - деп жазылат маалыматта.