"Ишенбей турган болсоңор, мен силерге көрсөтөм!". Рамзан Кадыровдун уулу талаштуу жеңиши боюнча үн катты

Чеченстандын башчысы Рамзан Кадыровдун 13 жаштагы уулу Адам Кадыров Грозный шаарында өткөн бокс боюнча мелдеште талаштуу жеңишке жетишкендиги боюнча үн катты. Ал жеңишке таза жеткенин орусиялык басылмалардын бирине берген маегинде айткан.

"Беттештин биринчи жана экинчи бөлүгүн жакшылап карап, талдап, үчүнчүсүндө чабуул жасагым келген. Бирок калыстар беттешти токтотуп коюшту. Мен буга ыраазы эмесмин. Ким беттештин таза болгондугуна шектенсе, коюумуңарды (ставка) койгула! Мен силерге көрсөтөм!", - деген ал.

"Легендарлар убактысы 6: Атайын операция" деп аталган бокс боюнча мелдеште Адам Кадыров Аслан Баттиров аттуу мушкер менен кез келген. Беттештин экинчи бөлүгүндө жаш мушкерлер беттешип жаткан учурда калыс күтүлбөгөн жерден беттешти токтотуп, Адам Кадыровдун атаандашына 10 секунддук эсептөөнү баштаган. Бирок мушкерлердин бири дагы нокдаунга учураган эмес.

Көп өтпөй калыс Адам Кадыровго техникалык нокаут менен жеңишти ыйгарган.

Адам Кадыровдун бул жеңиши интернет колдонуучулар тарабынан кызуу талкууга алынган.