"Кыргыз жараны Эсен Маджитовду Тажикстан өздөрүнө туткун кылмак ниетте". Бишкекте анын боштондугун талап кылган митинг өтүп жатат

Кыргыз жараны Эсен Маджитовду Тажикстан экстрадициялап өздөрүнө туткун кылып жатканда Кыргыз бийлиги буга кайдыгер карабашы керек. Бул тууралуу бүгүн, 27-апрелде Тышкы иштер министрлигинин имаратынын алдында аны бошотууну талап кылган митинг өтүп жатат.

"Өз мекенин, өз жерин коргоп жаткан уул-кыздарыбыз кордоло берсе, эл тарабынан, мамлекет тарабынан коргоого алынбаса эртеңки муун коркок, кайдыгер, жалтак болуп чоңоюшу турган иш. Баткен чек ара чырында өз жерин коргойм деп тажиктер тарабынан үйү өрттөлгөн Эсен Мажитовду Тажик тарап Интерполго берип койгон себептен учурда Москвага барган жеринен кармалган.

Урматтуу мекендештер, өз уулубузду сактап калалы. Тышкы иштер министрлиги, Москвадагы элчилик өз жараныбыздын тагдырына кайдыгер болбой жардам беришин талап кылалы", - дешет Кыргыз жаранынын боштондугун талап кылган митингчилер.

Кечээ, 26-апрелде "Тажик тарап жолдошумду куру күнөөлөп, Орусиядан кармап камакка алышты" деген Эсен Мажитовдун жубайы SUPER.KG порталына окуянын чоо-жайын айтып берген.

Эске салсак, 2020-жылы 8-майда Баткен районунун Көк-Таш айылында кыргыздар менен тажиктердин ортосунда чыр чыккан. Жергиликтүү тургундардын жана расмий бийликтин билдиришинче чыр жер тилкесин талашуудан чыккан жана аныгында талашка түшкөн жер тилкеси кыргыздарга тиешелүү болгон. Тажик тарап чыр-чатак учурунда чек араны чок ортосунда жайгашкан кыргыз тарапка тиешелүү үйдү да өрттөп жиберишкен. Жер тилкеси үчүн 30-40ка чукул кыргыздар менен 30-40тай тажиктер бири-бирине таш ыргытышып, уруш учурунда ок дагы атылган.