Кочкордо мал уурулукту кесип кылып жүргөн эки адамдан турган кылмыштуу топ кармалды

Нарын ОИИБинин криминалдык милиция кызматы жана Кочкор РИИБинин кызматкерлери тарабынан мал уурулукту кесип кылып жүргөн кылмыштуу топ кармалды. Бул тууралуу облустук милициядан билдиришти.

Билдирүүгө ылайык, 25-апрель күнү Кочкор районунун аймагынан мал уурулукту кесип кылып жүргөн эки адамдан турган кылмыштуу топ кармалды. Алар Кочкор районунун тургундары 1975-жылы туулган К.Р. жана 1997-жылы туулган К.М. Алар айдап жүргөн Фольксваген Пассат үлгүсүндөгү автоунаасына кароо жүргүзгөн учурда унаадан 4 даана мал сойгон бычак, 1 даана балта жана мал сойгондо кийген кийимдери табылган. Ошондой эле ТОЗ-8 үлгүсүндөгү сайлуу ок атуучу куралы 27 даана октору менен далил зат катары алынган.

Жүргүзүлгөн сотко чейинки өндүрүш иштеринин жүрүшүндө Кочкор районунун аймагында бети ачылбай турган уурдалган 5 баш жылкыларды жогоруда көрсөтүлгөн ок атуучу куралы менен атып, союп кеткендиги аныкталган.

Шектүүлөр Кочкор РИИБинин убактылуу кармоочу жайында камакка алынган. Бүгүнкү күндө тергөө амалдары жүргүзүлүп жатат.