"Тез жардам" унаасынын терезесин сындырган. Бишкекте бейбаштыкка шектүү жаран кармалды

Бишкек шаарында бейбаштык кылууга шектүү жаран кармалды. Бул тууралуу Милициянын кайгуул кызматынын басма сөз кызматынан билдиришти.

Ага ылайык, 26-апрелде болжол менен саат 18:15 чамасында “102” кызматына Орозбеков көчөсүндө мас жаран коомдук тартипти бузуп жатат деген маалымат келип түшкөн.

"Айтылган дарекке милициянын кайгуул кызматкерлери барып, маалыматты тактаганда 1964-жылы туулган жаран арыз менен кайрылган. Анда болжол менен жашы 25-30 жаштагы жаран мас абалында коомдук тартипти бузуп, "Тез жардам" унаасынын терезесин талкалап материалдык чыгым келтиргенин жазган.

Кармоо иш-чараларынын натыйжасында кылмыш изи сууй электе шектүү катары 1993-жылы туулган жаран кармалып, Свердлов РИИБинин тергөө кызматына өткөрүлүп берилген. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынды", - деп жазылат маалыматта.