Башкы прокуратура чек арадагы жаңжал боюнча иш козгоду

Кыргыз-Тажик чек арасында орун алган жаңжалдан улам кылмыш иши козголду. Бул тууралуу Башкы прокуратуранын басма сөз кызматынан кабарлашты.

"Тажикстандын аскер кызматкерлеринин иш-аракеттери эл аралык келишимдерди бузуу менен мамлекеттин бүтүндүгүнө каршы алдын ала пландаштырылган чагымчылдык катары бааланат. 2021-жылдын 29-апрелинде бул факты Кыргыз Республикасынын Кылмыш-жаза кодексинин 380-беренесинин ("тынчтыкка каршы кылмыш") реестрге Кыргыз Республикасынын Башкы прокуратурасы тарабынан катталган. Сотко чейинки өндүрүш иши УКМК, Ички иштер министрлиги жана Аскер прокуратурасынын кызматкерлеринин арасынан ведомстволор аралык тергөө тобуна тапшырылды", - деп жазылат билдирүүдө.

Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен. Акыркы маалыматтар боюнча, кагылышуудан кыргыз тараптан 84 адам жаракат алып, 3 адам каза болду.

Буга чейин эки өлкөнүн тышкы иштер министрлери саат 20:00дөн баштап ок атышпоо чечимин кабыл алгандыгы кабарланган.