Кыргыз тарап Тажикстандын бир заставасын басып алды деген маалыматты Тажикстан четке какты

"Кыргыз өлкөсүнүн чек арачылары Тажикстандын "Хожа Алъо" чек ара заставасын басып алган эмес" деп Тажикстандын Улуттук коопсуздук мамлекеттик комитетинин Чек ара кызматы маалымат таратты.

"Тажикстан Республикасынын "Хожа Алъо" чек ара заставасын Кыргыз өлкөсүнүн чек ара кызматынын "Бөрү" атайын ыкчам тобу тартып алгандыгы жөнүндө маалымат провокациялык мүнөздөгү жалган маалымат болуп саналат. Провокацияга алдырбооңузду суранабыз", - деп жазылат билдирүүдө.

Белгилей кетсек, Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен.

"Тажик тараптын миномёт менен аткылаганынан, Баткен чек ара отрядынын "Достук" чек ара заставасынын имараты күйүп кеткен. Мындан улам тажик тарапка жооп катары Кыргыз өлкөсүнүн УКМКсынын "Бөрү" атайын даярдыктагы аскер бөлүгү Тажикстандын "Хожа Аъло" чек ара заставасын басып кирди", - деп Чек ара кызматы маалымат тараткан болчу.