"Ворух, биз сени менен!". Орусиялык белгилүү блогер Тажикстанды колдоп чыгып, кийин кечирим сурады (видео)

Социалдык тармактарда орусиялык белгилүү блогер Асхаб Тамаевдин Тажикстанды колдоп чыккан видеосу тарады.

Видеодо ал Тажикстандын улуттук кийимин кийип, "Тажикстан, Ворух, биз силер менен. Өзүңөрдү колго алгыла" деген.

Кийинчерээк Тамаев видео боюнча өзүнүн социалдык тармактагы баракчасы аркылуу түшүндүрмө берди. Айтымында ал эки элдин ортосунда кагылышуу орун алганын билген эмес.

"Биз видео тартып жатканда Тажикстандын улуттук кийимин кийген адам мага келип, Асхаб, сен Ворухка салам айтып коё аласыңбы деди. Мен түшүнбөй, Ворух ал эмне деп сурадым. Ал мага "Тажикстанда трагедия болгон айыл, чын дилиңден колдоп койчу" деп айтты. Көрсө, алардын ортосунда башка өлкө менен кагылышуу болуптур. Мен муну чындыгында билген эмесмин. Кимди капа кылган болсом кечирип коюуңуздар. Мен тынчтык жана жакшылык тараптамын", - деп түшүндүрмө берди Тамаев.

Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен. Акыркы маалыматтар боюнча, кагылышуудан кыргыз тараптан 173 адам жаракат алып, 34 адам каза болду. Бүгүн, 2-майга карата Баткенде абал туруктуу.