"Киши өлтүрүү", "Чек арадан мыйзамсыз өтүү" жана башка. Чек арадагы окуя боюнча 11 кылмыш иши иликтене баштады

Ички иштер министрлиги чек арага чектеш аймактарда катталган фактылар боюнча кылмыш ишин иликтөөнү баштады. Бул мыйзамсыз аракеттердин кесепетинен кыргыз тарап көптөгөн зыяндарга учураганын министрликтин басма сөз кызматынан кабарлашты.

Баткен облусундагы иликтене турган иштердин өтө көп экендигине байланыштуу жергиликтүү тергөөчүлөргө жардамга ИИМдин тергөө кызматынан жыйырма тажрыйбалуу кызматкер жөнөтүлдү. Учурда келтирилген чыгымдын эсеби такталууда. Иликтөө иштери жүрүп жатат", - деп маалымдашты.

Кылмыштардын жана жоруктардын бирдиктүү реестрине катталган материалдар: Кыргыз Республикасынын Жазык кодексинин 264-беренесинде (массалык баш аламандык), 380-беренесинде (тынчтыкка каршы кылмыш), 210-беренесинде (башка бирөөнүн мүлкүн жок кылуу же талкалоо), 266-беренесинде (бейбаштык), 358-беренесинде (мамлекеттик чек арадан мыйзамсыз өтүү), 130-беренесинде (киши өлтүрүү) көрсөтүлгөн кылмыш белгилери, анын ичинде куралдан атуунун кесепетинен Лейлек районундагы он эки жаштагы кыздын өлүмү, Баткен районунун Ак-Сай айыл аймагындагы Головной тилкесинде миномёттен атылган октон 25тен ашык жергиликтүү тургундардын массалык түрдө өлтүрүлүшү (саны такталып жатат), жолдордогу унааларды аткылоо, анын ичинде да курман болгондор катталган.

Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен. Акыркы маалыматтар боюнча, кагылышуудан кыргыз тараптан 178 адам жаракат алып, 34 адам каза болду.