Бишкекте 17 жаштагы өспүрүмдү уурдаганга шектелген 3 жаран кармалды

Бишкекте киши уурдоого шектелген жарандар кармалды. Бул тууралуу милициянын кайгуул кызматынан билдиришти.

Билдирүүгө ылайык, 3-май күнү болжол менен саат 16:40 чамасында Бишкек ШИИББинин 102 кызматына Бишкек шаарынын Көлбаев көчөсүнөн өспүрүмдү уурдап кетишти деген маалымат келип түшкөн. Айтылган дарекке ошол замат милициянын кайгуул кызматкерлери келип, маалыматты тактаганда, ошол эле даректен 2004-жылы туулган өспүрүмдү 20-25 курактага балдар күч колдонуп, белгисиз унаага салып кетишкендиги аныкталган.

Ыкчам издөө иш-чараларынын жүрүшүндө, кылмыш изи сууй электе шектүү катары 1991-жылы туулган С.И., 1997-жылы туулган У.К. жана 1992-жылы туулган А.Н. аттуу жарандар кармалган.

Шектүүлөр Свердлов РИИБинин тергөө кызматына өткөрүп берилип, бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.