Голливуд жылдыздары ак илбирсти сактоо боюнча форумга келишкен жок

Голливуддун жылдыздары Бишкекте өтүп жаткан ак илбирсти сактоо боюнча форумга келишкен жок. Буга чейин уюштуруучулар жолугушууга Голливуддун жана дүйнөгө белгилүү спорт жылдыздары: Бред Питт, Форд Харрисон, атактуу теннисчи Роджер Федерер, Япониянын ханбийкеси, Орусиянын кино жана эстрада жылдыздары чакырылганын айтышкан эле. Бирок сентябрда өтүүчү форум Бишкектеги Шанхай кызматташтык уюмунун саммитинен улам 20-октябрга жылдырылгандыктан чакырылган коноктор келбей калышкан. "Башкысы жылдыздар эмес, форумдун өтүшү маанилүү. Биринчи жолу илбирс байырлаган өлкөлөрдүн өкүлдөрүн чогулттук. 2020-жылга чейин ак илбирсти сактоо боюнча глобалдык программаны ишке ашырып, коомчулуктун көңүлүн жоголуп бараткан жаныбарга бурабыз деген ишеничтебиз",- деп билдиришти Мамлекеттик айлана-чөйрөнү коргоо агенттигинен.