"Жер тилке алып берем деп акчасын алган". Бишкекте алдамчылыкка шектелип 54 жаштагы аял кармалды

Бишкекте алдамчылыкка шектелип 54 жаштагы аял кармалды. Бул тууралуу Ленин РИИБинин басма сөз кызматынан билдиришти.

Маалыматка караганда, 2021-жылдын 22-февраль күнү Ленин райондук милициясына шаар тургуну арыз менен кайрылган. Анда чала тааныш аял арыз ээсинин ишенимине кирип, 2014-жылы Чүйдүн аймагынан 4 жер тилкесин алып берем деп 9 миң 200 долларын алып, убадасын аткарбай качып кеткенин жазган.

Бул факты Кылмыштардын жана жоруктардын бирдиктүү реестрине 204-беренеси "алдамчылык" менен катталып, сотко чейинки өндүрүшкө алынган.

"Иликтөө иштеринин натыйжасында жогорудагы кылмышка шектелип 1967-жылы туулган аял кармалып, СИЗО-1ге эки айга камакка алынган. Мындан сырткары, Ленин РИИБине шектүү аялдын үстүнөн дагы 4 жарандан арыз келип түшкөн, учурда келтирилген чыгымдар такталууда. Бүгүнкү күндө иликтөө иштери уланууда", - деп айтылат маалыматта.