Баткенге Тажикстандын фураларын өткөрбөйбүз деген жарандарга орой мамиле жасаган милиция кызматкерине карата териштирүү башталды

Буга чейин Баткен облусунда милиция кызматкерлери Тажикстандын фураларын өткөрүп жатат деген видео тарап катуу талкууга алынган. Анда облустук ички иштер башкармалыгынын кызматкеринин сөгүнүп, жарандарга кылган мамилеси дагы талкуу жараткан. Бул боюнча кызматтык териштирүү башталганын облустук милициядан билдиришти.

"11-май күнү Баткенде 3 тажик жарандарынын оор жүк ташуучу унаасы келип, эл тарабынан токтотулуп, ызы-чуу салганда облустук ички иштер башкармалыгынын айрым бир кызматкерлери тарабынан одоно мамиле жасалган. Ошол жерде турган жергиликтүү тургундар менен сөгүшүп жаткан видеолору коомчукка социалдык тармак аркылуу таркап, милициянын беделине терс пикирлер жазылды.

Облустук ички иштер башкармалыгынын кызматкерлеринин жүрүм-турум нормаларына туура келбеген жагдайларды жараткандыгы үчүн ички иликтөө кызматы тарабынан кызматтык териштирүүлөр башталды. Кызматтык териштирүүлөрдүн жыйынтыгында бул кызматкерлерге тартиптик чаралар колдонулат", - деп жазылат маалыматта.