Эмомали Рахмон чек ара чырында каза болгон жарандардын жакындарына көңүл айтты

Тажикстандын президенти Эмомали Рахмон чек ара чырында каза болгон жарандардын жакындарына эки аптадан кийин көңүл айтты. Бул тууралуу аталган өлкөнүн жергиликтүү маалымат каражаттары жазып чыгышты.

"Тажик-Кыргыз мамлекеттик чек ара чырында каза болгон жарандардын жакындарына терең кайгыруу менен көңүл айтам. Кудай баарыңызга сабыр берсин", - деген Эмомали Рахмон. Ошондой эле жаракат алгандарга батыраак сакайып кетүүнү каалаган.

Маалымат үчүн: Кыргыз-Тажик чек ара чыры 28-29-апрелде чыккан. Жаңжалдан Тажикстандын 19 жараны каза болуп, 87 адам жаракат алган.

Ал эми Тажикстандын агрессивдүү кол салуусунан кыргыз тараптан 36 жаран каза болуп, 189 адам жаракат алган. Президент Садыр Жапаров 1-2-майды аза күтүү күнү деп жарыялаган.

Буга чейин тажик оппозиясынын өкүлдөрү Эмомали Рахмонду каза болгон жарандардын жакындарына көңүл айтпаганын сындашкан.