Казакстанда 372 сайгактын өлүгү табылды

Казакстандын Батыш-Казакстан облусунан 372 сайгактын (чөл кийиги) өлүгү табылды. Бул тууралуу казакстандык басылмалар жазып чыгышты.

Маалыматка ылайык, бул окуя Жанибек районунун Тауск айылдык округунда катталган. Алгач жергиликтүү тургундар өлүү жаткан 372 сайгак каналдын жээгинен жана жардан табылганын айтып, социалдык тармактар аркылуу билдирүү таратышкан.

Аталган округдун токой чарба инспекциясынын жетекчиси Кайрат Кадешев бул маалыматты ырастаган. "Тиешелүү органдар жеринде иш алып барышууда. Бул аймакта катуу жамгыр жаап, чагылган түшкөн. Сайгактарга да чагылган тийгени текшерүүдө белгилүү болду. Учурда экспертизага жөнөтүлдү. Жалпысынан 372 сайгактын өлүгү табылды", - деген Кайрат Кадешев.