Чек арада кайрадан чыр. Тажик тарап 3 жаранды кармап, кайра коё бергени айтылды

Бүгүн, 17-майда эртең менен белгисиз адамдар Баткен районундагы Ак-Сай айылынын тургундарын кармап, Тажикстандын Ворух анклавынын аймагына алып кетишкен. Бул тууралуу жергиликтүү тургун кабарлады.

Айтымында, бул окуяга байланыштуу эки тараптын өкмөт өкүлдөрү сүйлөшүү жүргүзүшкөн.

"Бир нече тургун жайлоодон кайтып келе жатканда, алардын үчөөнү жолдон кармап, алып кетишкен. Алар Портер үлгүсүндөгү жүк ташуучу унаа менен келе жатышкан. Буга байланыштуу укук коргоо органдары менен сүйлөшүүлөрдөн кийин алар бошотулган. Абал негизинен туруктуу, бирок айрым тургундар барымтага алынгандар жөнүндө маалыматтын тарашынан улам дүрбөлөңгө түшүп, айылдан чыгып кетүүгө аракет кылышкан", - деди жергиликтүү тургун.

Ал эми бул боюнча Баткендеги өкмөт өкүлчүлүгү чалууларга жооп бербей жатат.

Жергиликтүү тургундар аймактагы бардык жолдор ачык экендигин белгилешти.