Чоң-Алай аймагындагы Кыргыз-Тажик чек ара тилкесине эки тараптын тең жарандары кирбей турган болду

Ош облусунун Чоң-Алай району жана Тажикстандын Лахш (Жерге-Тал) аймагындагы Кыргыз-Тажик чек ара тилкесине эки тараптын тең аскерлери жана жарандары кирбейт. Бул тууралуу эки өлкөнүн чек ара тозотторунун башчылары жолугуп сүйлөшкөндөн кийин белгилүү болгонун Министрлер кабинетинин Ош облусундагы өкүлчүлүгү SUPER.KG порталына кабарлады.

Өкүлчүлүктүн маалыматына ылайык, интернетте "Чоң-Алай районунун Жекенди айыл өкмөтүнө караган аймактагы такталбаган жайытка тажик аскерлери техникасы менен кирип келди" деп тарап жаткан маалымат чындыкка дал келбейт.

Район акими Өскөн Мамажакыпов менен байланышканыбызда, ал Унжу-Булак жана Караганды-Сай жайыттарына өтүп кеткен мал-жандыкты чек арачылар азыркы тапта кайтарып жатат.

"Чоң-Алай менен Тажикстан чектешкен аймактагы жер 1924, 1927 жана 1989-жылдардагы карталар боюнча жер алардын картасында экен. Бирок жерди биздин жарандар эле иштетип жүргөн. Демаркация жана делимитация иштери жүргүзүлө электигинен мурда алардын чек арачылары алыстан көзөмөлдөп турса, учурда аймактын өзүнө кирип көзөмөлгө алып алышкан.

Бирок ал жер Тажикстанга караганда бизге ыңгайлуу жер. Эки тараптын чек ара тозотторунун башчылары жолугуп, такталбаган аймакка эки тараптын тең аскерлери кирбей туруу боюнча сүйлөшүлдү", - деди аким.

Бүгүн, 19-майда Жогорку Кеңештин жыйынында депутат Бурун Аманова чек ара маселесин кароону сунуштаган.

Ал "Алай тарапта чек араны тажик тарап бузуп жатканы жөнүндө маалыматтар чыгып жатат. Бул маалыматтын канчалык чындыгы бар? Чек ара кызматын чакырып маалымат алалы", - деген Аманова.