Бокс. Дүйнө чемпиондугу – 2013: Азат Үсөналиевдин жеңишин калыстар казак мушкерине ыйгарды

22-октябрь күнү Казакстандын Алматы шаарында өтүп жаткан бокс боюнча Дүйнө чемпиондугунун 9-күнүндө 52 килограмм салмактагы кыргыз боксчусу Азат Үсөналиев 1/8 финалдык беттешин өткөрдү. Азат 1/8 финалда мелдеш кожоюну казакстандык Ильяс Сулейманов аттуу боксчу менен кез келип, беттештин жыйынтыгында 2 калыс казак мушкерин жеңүүчү деп тапса, бир калыс Азатты жеңүүчү деп тапты. Беттештин өзүнө келсек 1-раундда Азат чапчаң кыймылдап, бир нече таамай соккулары менен эсте калса, казак мушкери бул учурда 2-номур менен иштеп эч кандай аракети эсте калган жок. Ал эми 2-раундда казак мушкери аралыкты кыскартууга аракет кылып жатты, Азат аралыкты мыкты кармап, эки боксчу тең жогорку ылдамдыктагы бокс тартуулашты. 3-раундда эки боксчу тең бири-бирине бир нече таамай соккуларды узатууга жетишти, бирок Азат 1-номур менен ойноп активдүү болуп жатты. Беттеш жыйынтыкталганда Азат жеңишке жеткенине ишенип, кубанып турса, казак мушкери утулгандай абалда турган болчу. Бирок калыстар түшүнүксүз болгон 2:1 эсеби менен казак мушкерин жеңүүчү деп атады. Мындай чечим Азат үчүн да күтүүсүз болуп, ызасын жашырган жок. Чынында казак мушкери жеңишке татыктуу беттеш өткөрө алган жок. Ошондуктан калыстар кайсы беттешти көрүп отурганы суроо жаратпай койбойт. Ошондой эле калыстар жеңүүчүнү кандай аныкташканы да белгисиз. Сырттан карап турган кишиге калыстар сөзсүз мелдеш кожоюну жеңиш керек деген талап менен жеңүүчүнү аныктагандай эле болду. Казак мушкери өзү да  беттештен кийин берген маегинде жеңдим деп айта алган жок. “Мен Азат Үсөналиев менен буга чейин эки ирет кездешкем, бирөөндө ал, бирөөндө мен жеңишке жеткем. Бүгүн болсо өз үйүмдө ойноп жаткандан кийин бир аз ишенимдүү беттеш өткөрүүгө аракет кылдым”-, дейт казак мушкери Ильяс Сулейманов. Ал эми учурда Дүйнө чемпиондугунда жолун улап жаткан бир гана кыргыз мушкери калды. Ал 64 килограмм салмактагы Эрмек Сакенов. Бирок анын да чейрек финалдагы атаандашы казак мушкери болгондуктан таза жеңишке жетпесе, жеңишке жетүү мүмкүнчүлүгү өтө аз. Эрмек бүгүн, 23-октябрь күнү саат 14:00дө казакстандык Мерей Акшалов менен беттешет.