Кыргыз өлкөсүнө Австралиядан ар бири 2 миң 500 доллар болгон 102 кой алып келинди

Чүй облусунун Кемин районуна жеке фермерлер аркылуу Австралиядан учак менен ар бири 2 миң 500 доллар болгон 102 баш кой алып келинди. Бул тууралуу Айыл, токой жана суу чарба министрлигинин басма сөз кызматынан билдиришти.

Маалыматка ылайык, кечээ, 19-майда министр Аскарбек Жаныбеков Кемин районуна караштуу Орловка айылында жайгашкан Дорпер асыл тукум кой өстүрүү чарбасы менен жеринен таанышты. Бул чарба бодо малды асылдандыруу жана бордоп семиртүү менен алектенсе, эми койдун ушул тукумун көбөйтүү үчүн адистештирилген чарба толугу менен кайра даярдалды.

Австралиядан келечекте дагы 1 миң баш кой алып келүү планы бар. Койлор сырттан келгендиктен, 30 күнгө карантинге киргизилди. Бир ай бою мал доктурлардын көзөмөлүндө болот.

Дорпер породасы Африка менен Англиянын койлорунун аргындаштыруусунан келип чыккан.

Бул койдун этин май каптап семирбейт. Эти Абердин-ангусс породасындагы букалардын этине окшош. Атайын жем-чөп тандабайт. Бир жылда 2 жолу, анан дагы көбү эгиздеп төлдөйт. Тирүү салмагы 140 килограммга чейин барат.

Дорпер породасы дүйнөдөгү эң көп керектелүүчү булгаары болуп саналат жана бул койдун териси Cape Glovers деген ат менен сатылат