Таиландда вакцина алгандарга уй жана акчалай сыйлык берилет

Таиландда коронавируска каршы эмдөө үчүн жарандарга уй жана акчалай сыйлык берүү убада кылынды. Бул тууралуу чет элдик басылмалар жазып чыгышты.

Маалыматка ылайык, Чиангмай провинциясынын бийлиги эмделген бардык адамдарды акчалай сыйлыгы бар лотереяга катышууга чакырат. Сыйлыктын баасы 318, 160 жана 78 доллар. Ошондой эле алар жума сайын эмдөөдөн өткөн бир айылдашын тандап алышат жана ага 321 доллар (27 миң сомдун айланасында) турган уй беришет.

Мындан тышкары эмдөө сертификатын көрсөткөндөн кийин жергиликтүү дүкөндөрдө жана ресторандарда 10 пайыз арзандатуу болот.

Ошентип өлкө калктын COVID-19га каршы иммунитетин иштеп чыгуу процессин тездетүү үчүн эмдөөнүн мотивациясын жогорулатууну каалайт. Жарандар бийликтин демилгесин оң кабыл алышканы белгилүү болду.