Тажикстанда айдоо аянттарын чегирткелер каптап жатат

Тажикстандын Айыл чарба министрлиги чегирткелер айдоо аянттарынын 83 миң 944 гектар жерине жайылгандыгын билдирди. Бул тууралуу тажикстандык басылмалар жазып чыгышты.

Маалыматка ылайык, учурда 67 миң гектарга жакын аянтта химиялык тазалоо иштери жүргүзүлдү.

Чегирткелер көбүнчө Хатлон районундагы (55,1 миң гектар) эгиндерге коркунуч туудурган. Министрликтин алдында чегирткелерге каршы күрөшүү боюнча экспедиция иштеп жатат. Алар учурда талааларды чегиртке басып кетпөө үчүн бардык чараларды көрүүдө. Айыл чарба министри Сулаймон Зиёзода бир ай мурун чарбаларды чегирткелердин жайылып кетиши мүмкүн деп эскертип, жергиликтүү бийликти курт-кумурскалар менен күрөшүү чараларын көрүүгө чакырган. Бирок курт-кумурскалар өлкөнүн бардык чөлкөмүнө кеңири тараган жана коңшу мамлекеттер, эл аралык уюмдар менен биргеликте иш алып барууну талап кылууда.

Бириккен улуттар уюмунун Азык-түлүк жана айыл чарба уюмунун маалыматы боюнча, чегирткелердин үйүрү да бир жылда 2500 кишини тойгуза турган эгинди жок кылышы мүмкүн.