Депутат Асылбек Жээнбековдун Мелис Аспековдун үстүнөн жазган арызы сотко келип түштү

Жогорку Кеңештин депутаты Асылбек Жээнбековдун Мелис Аспековдун үстүнөн жазган арызы Чүйдүн Аламүдүн райондук сотуна келип түштү. Бул тууралуу Чүй облустук сотунун басма сөз кызматынан билдиришти.

Маалыматка ылайык, арыз кечээ, 25-майда Аламүдүн райондук сотуна келип түшкөн. Арызда Мелис Аспековдун айткан маалыматтары Жээнбековдун кадыр-баркына доо кетиргени жазылган.

"Жээнбеков бир миллион сом өлчөмүндө доо койду. Жазылган арызда Сооронбай Жээнбеков жок", - деди басма сөз кызматынан.

Буга чейин УКМКда камакта отурган активист Мелис Аспеков 14-май күнү өзүнүн Фейсбук баракчасына "Садыр Жапаров шайлоодо Сооронбай, Асылбек Жээнбековдордон 10 миллион доллар алган, аларды жоопкерчиликке тартпайт, камай албайт", - деген билдирүү жазган. Ага Жээнбековдордун жактоочусу сотко кайрыларын айтышкан.