Прокуратура: "Суракматов жана Жогорку Кеңештин мурдагы депутаты жер тилкелерин мыйзамсыз ээлеп алган"

Бишкектин экс-мэри Азиз Суракматов Жогорку Кеңештин мурдагы депутаты Ж.Кудайбергенов (Суракматовдун аталаш тууганы) менен биргеликте коррупциялык схеманы колдонуп, мыйзамсыз иштерди жасаганы аныкталды. Бул тууралуу Башкы прокуратуранын маалымат кызматынан билдиришти.

Маалыматка караганда, Суракматов тууганы менен биргеликте борбор калаанын түштүк бөлүгүнүн эң кымбат аймагынан 15 гектар жерди менчигине өткөрүп алган.

"Мындан тышкары алар коррупциялык схемалар аркылуу өздөрүнүн жакын туугандарына жана байланышы бар курулуш компанияларына көп кабатту турак үйлөрдү, кафе, ресто-барларды мыйзамсыз куруу, сатуу жана ижарага берүү максатында жер тилкелерди менчикке жана узак мөөнөткө алышкан. Ал туугандарынын арасында бөлүштүрүлүп, миллиондогон бааны түзгөн активдерди кирешелер боюнча декларацияга көрсөтүшпөй, эбегейсиз байышкан жана ижарадагы 1,83 гектар муниципалдык жер тилкеси мыйзамсыз банкка күрөөгө коюлуп, 3 миллион долларга алышкандыгы аныкталган", - деп айтылат маалыматта.

Башкы прокуратуранын Суракматов менен Кудайбергенов боюнча топтогон материалдары Кылмыш-жаза кодексинин "коррупция" жана "мыйзамсыз баюу" беренелери менен Кылмыштардын жана жоруктардын бирдиктүү реестрине каттоого алынды. Учурда сотко чейинки өндүрүш иши башталганын кошумчалашты.