23-октябрда Бишкектин Горький көчөсүндөгү жол кырсыгынан 4 адам жаракат алды

Бүгүн, 23-октябрда таңкы саат 05:40тар чамасында Бишкек шаарындагы Максим Горький көчөсү менен чыгыш тарапка бара жаткан Фольксваген-Гольф-3 автоунаасынын айдоочусу Алтын-Ордо конушунун жанынан жол кырсыгына кабылды. Бул тууралуу Бишкек шаардык ички иштер бөлүмүнүн басма сөз кызматы маалымдады. Аталган автоунаанын айдоочусу 1991-жылы туулган А.К. алгач тосмону сүзүп, рулду башкара албай калат да, анан барып темир мамыны сүзгөн. Жол кырсыгынан жабыркагандар: айдоочу - 1991-жылы туулган А.Кнын жамбаш сөөгү сынып, №4 шаардык клиникалык ооруканага, жүргүнчүлөр - 1991-жылы туулган И.Ж. ички органдарынын жаракаты диагнозу менен №4 ооруканага, 1982-жылы туулган Д.А. №4 шаардык оорукананын реанимация бөлүмүнө, 1991-жылы туулган Н.М. баш мээси чайкалып Улуттук госпиталга жеткирилди. Автоунаа убактылуу унаа токтотуучу жайга токтотулуп, бардык материалдар Бишкек шаардык ички иштер бөлүмүнүн жол кырсыктарын иликтөө боюнча бөлүмүнө өткөрүлүп берилди.